पुणे! दामिनी मार्शल सोनाली हिंगे यांची तत्परता अन् कुटुंब आले एकत्र... - पोलीसकाका

पुणे (संदिप कद्रे): आई-वडिलांच्या भांडणाला कंटाळून एका दहावीत शिकणाऱ्या मुलीने घर सोडले. मात्र, तिला वेळीच मदत मिळाल्याने तिच्या घरातील नात्यांचा तिढा संपुष्टात आला आणि सर्वांचं मनोमिलन झाले. यामुळे मुलगी आनंदी असून, तिने दामिनी मार्शल सोनाली हिंगे यांचे आभार मानले आहेत.

शिवाजीनगर पोलीस स्टेशनमधील दामिनी मार्शल सोनाली हिंगे यांनी सांगितले की, 18 ऑगस्ट रोजी सकाळी त्यांना एका दहावीत शिकणाऱ्या शाळकरी मुलीचा फोन आला होता. ‘मी घर सोडून जात आहे आणि मला मदतीची गरज आहे,’ असे मुलीने सांगितले. संबंधित मुलीचे आई-वडील एकत्र राहत नव्हते. घटस्फोटाचा कोर्टात खटला सुरू असल्याने मुलगी मानसिक तणावाखाली होती.

मुलीचा फोन आल्यानंतर सोनाली हिंगे यांनी तत्काळ मुलीच्या शाळेत संपर्क साधून शाळेच्या प्राचार्यांची भेट घेतली. त्यानंतर मुलीच्या पालकांना शाळेत बोलावून त्यांच्याशी देखील हिंगे यांनी सविस्तर चर्चा केली. या चर्चेनंतर मुलीच्या आई-वडिलांचे मनोमिलन होऊन त्यांनी घटस्फोटाचा निर्णय मागे घेतला. पीडित मुलीच्या पालकांशी मार्शल सोनाली हिंगे यांनी चर्चा केली. “तुमची मुलगी तुमचं भविष्य आहे. अशा कोवळ्या जिवाला जपा, सदर मुलगी हि 10 वी कक्षेमध्ये शाळेमध्ये टॉपर आहे.” अशी भावनिक साद त्यांनी मुलीच्या पालकांना घातली. त्यानंतर मुलीच्या पालकांनी मतभेद बाजूला सारून घटस्फोट घेण्याचा निर्णय रद्द केला.

सदर मुलगी ही तिच्या आई बाबांसोबत एकत्र राहण्यास मिळत आहे, म्हणून खूप खुश झाली. सदर मुलीने, प्रिन्सिपल आणि सदर मुलीच्या पालकांनी दामिनी मार्शल व पोलीस प्रशासन पुणे शहर यांचे खूप मनापासून आभार मानले आहे. सदरची कामगिरी म पो शी 10920/हिंगे शिवाजीनगर पो ठाणे यांनी केलेली आहे.

दरम्यान, दामिनी मार्शल पथकांची 2015 मध्ये स्थापना करण्यात आली आहे. हे पथक महिलांचे रक्षण करण्यासाठी आणि त्यांच्या समस्या सोडवण्यासाठी तयार करण्यात आले आहे. या पथकाला असंख्य महिलांकडून सकारात्मक प्रतिसाद मिळाला आहे.