दामिनी मार्शल सोनली हिंगे यांच्या हस्तक्षेपामुळे अल्पवयीन मुलीचे थांबले लग्न... - पोलीसकाका

पुणे (संदिप कद्रे): शिवाजीनगर पोलिस ठाणे हद्दीतील एका शाळेत शिकणाऱ्या सातवीच्या विद्यार्थिनीचे शिक्षण थांबवून तिचे लग्न लावण्याचा पालकांचा विचार दामिनी मार्शल सोनली हिंगे यांच्या हस्तक्षेपामुळे हाणून पाडण्यात आला आहे.

शिवाजीनगर पो ठाणे हद्दीतील एका शाळेतील शिक्षकांचा मदतीकरिता कॉल आला की, त्यांच्या शाळेतील सातवीच्या वर्गातील एक विद्यार्थिनी मागच्या 8-10 दिवसांपासून शाळेत येत नाही व तिच्या मैत्रिणीकडून समजले की तिचे लग्न लावण्याचा तिच्या घरच्यांचा विचार आहे. सदरबाबत तात्काळ दामिनी मार्शल मपोशी सोनाली हिंगे यांना सदर शाळेमध्ये पाठविण्यात आले.

दामिनी मार्शल मपोशी हिंगे यांनी शिक्षकांसह मुलीच्या घरी जाऊन पालकांशी चर्चा केली. पालक मोलमजुरी करत असल्याने व चार मुली असल्याने शिक्षणाचा खर्च परवडत नसल्याचे त्यांनी सांगितले. मात्र दामिनी पथक व शिक्षकांनी समजावून सांगितले की अल्पवयीन मुलीचे लग्न हा गुन्हा आहे. तसेच शिक्षणामुळेच मुलींचे आयुष्य उज्वल होईल, नाहीतर त्यांचे भविष्यही मजुरीतच जाईल, हे पटवून दिले.

या वेळी मुलगी भावुक होऊन रडायला लागली. “पप्पांना पकडून नेऊ नका” असे म्हणताच तिच्या वडिलांचेही डोळे पाणावले आणि त्यांनी सर्व मुलींना शिक्षण देण्याचा तसेच शिक्षण पूर्ण होऊन नोकरी मिळेपर्यंत लग्न न करण्याचा निर्णय घेतला. या घटनेमुळे सातवीच्या विद्यार्थिनीचे व तिच्या तीन बहिणींचे शिक्षण वाचले. मुलीच्या घरच्यांनी दामिनी पथक, पुणे पोलिस व शाळेतील शिक्षकांचे मनःपूर्वक आभार मानले.