नामांकित कंपनीत नोकरी पाहिजे? अशी जाहिरात पाहिली असेल तर थांबा... - पोलीसकाका

(संतोष धायबर santosh.dhaybar@gmail.com)
पुणे : पुण्यातील नामांकित कंपनीमध्ये मुलांची डायरेक्ट परमनंट भरती. पगार १६,५०० ते ६०,००० आणि भरपूर प्रलोभणे असणारी जाहिरात परराज्यात, परजिल्ह्यात केली जाते. बेरोजगार युवकांची मानसिक, शारिरीक आणि आर्थिक फसवणूक होत असल्याचा प्रकार सध्या पुणे जिल्ह्यातील Ranjangaon Midc मध्ये होत आहे.

परराज्यात, परजिल्ह्यात अथवा सोशल मीडियावरून नोकरीची जाहिरात व्हायरल केली जाते. अनेक बेरोजगार युवक नोकरीच्या आशेने संपर्क साधतात. स्थानिकांनी संपर्क केल्यानंतर समोरून उत्तर दिले जात नाही. मात्र, परराज्यातील अथवा परजिल्ह्यातील बेरोजगार युवकांना शोधून त्यांना बोलावले जाते. रांजणगाव एमआयडीसीमध्ये एकदा आले की सुरू होते ती गुलामगिरी. एखाद्या खोलीमध्ये गुलामासारखे डांबले जाते. नको ती कामे करून घेतली जातात. पोटभर जेवण मिळत नाही. पैसे मागितल्यानंतर मारहाण केली जाते. शिवाय, त्यांच्याकडून पैसे उकळले जातात. अगोदरच बेरोजगार आणि त्यामध्ये दहशतीखाली जीवन जगावे लागते. अनेकजण तोंड दाबून बुक्क्यांचा मार सहन करतात. पण, संधी मिळताच अनेकजण गुपचूप सुटका करून घेतात आणि पळ काढतात. जीवंत राहिलो हेच त्यांच्यासाठी महत्त्वाचे असल्यामुळे तक्रार न करता निघून जातात.

‘पुणे गणपती डायरी २०२५-२६’ची प्रकाशनपूर्व नोंदणी सुरू…

परराज्यातून बेरोजगार युवक असल्यामुळे स्थानिक गोष्टींची माहिती नसते. शिवाय, गुंड ठेकेदारांची मोठी दहशत असल्यामुळे अनेकदा तक्रारी न करण्याच्या भानगडीत कोणी पडत नाही. ठेकेदारांच्या हेच पदरी पडत असल्यामुळे बेरोजगारीचा फायदा उचलत गलेलठ्ठ होत चालले आहेत. शिवाय, पुणे जिल्ह्यासह Ranjangaon Midcने नाव बदनाम करताना दिसत आहेत.

जाहिरातीमधील प्रलोभणे पाहा…
१) LG, Tata कंपनीमध्ये मुलांची डायरेक्ट परमनंट भरती
२) पगार : 16,500 ते ६०,००० हजार
३) कंपनी सुविधा : १) गरजू मुलांना प्राधान्य २) शिक्षण किंवा अनुभव अट नाही ३) संपर्क केल्यावर एक दिवसा जॉइनिंग ४) बाहेर गावातील मुलांसाठी जेवण, राहणे, बस फ्री

बाहेरगावातील मुलाांसाठी राहणे, जेवण व नाष्ट्याची सुविधा…
बस सुविधा, 8 तास काम, ओव्हर टाईम 160 ₹ तास, कामानुसार पगाराची वाढ, कामानुसार परमनंट होण्याची सांधी..!

दरम्यान, बेरोजगार युवकांसाठी खरंच एवढे कोणी करेल का? हे जाहिरात वाचल्यानंतर लक्षात येते. पण, गरजवंताला अक्कल नसते, त्या प्रमाणे त्याचा फायदा हे ठेकेदार गुंड उचलताना दिसत आहेत. Ranjangaon MIDC पोलिसांकडे यापूर्वी तक्रारी दाखल झाल्या असून, काही जणांना अटकही झाली आहे. पण, परराज्यातील बेरोजगार युवकांची फसवणूक करण्याचाच धंदा असल्यामुळे परत काही दिवसामध्ये जाहिराती व्हायरल करून लुबाडण्याचे प्रकार सुरू आहेत. यामुळे बेरोजगार युवकांनो नोकरी देण्याची जाहिरात पाहून आपली फसवणूक टाळा. शिवाय, फसवणूक होत असेल तर रांजणगाव एमआयडीसी पोलिस स्टेशनमध्ये जाऊन तक्रार करा, असे आवाहान पोलिस अधिकाऱ्यांनी केले आहे.
तक्रारीसाठी संपर्क : policekaka100@gmail.com

(क्रमशः)