वनराज आंदेकर हत्या प्रकरणात मोठा ट्वीस्ट; हत्यारे पुरवणारा आरोपी... - पोलीसकाका

पुणे : राष्ट्रवादी काँग्रेसचे माजी नगरसेवक वनराज आंदेक यांची १ सप्टेंबर रोजी हत्या करण्यात आली आहे. वनराज आंदेकर हत्याप्रकरणात शस्त्र पुरविणाऱ्याला अटक करण्यात आली आहे. संगम संपत वाघमारे असे अटक केलेल्या आरोपीचे नाव आहे. वनराज आंदेकर हत्याप्रकरणात आतापर्यंत तब्बल 15 जणांना अटक करण्यात आली आहे. यामध्ये आंदेकर यांच्या तीन बहिणींसोबतच तीन अल्पवयीनांचा समावेश आहे.

वनराज आंदेकर यांच्या हत्ये प्रकरणाचा गुन्हे शाखेकडून कसून तपास सुरू आहे. आरोपींना संगम वाघमारे (वय २०) याने शस्त्र पुरवल्याची माहिती गुन्हे शाखेला मिळाली. त्यानंतर गुन्हे शाखेनं आरोपीच्या मुसक्या आवळल्या आहेत. पोलिसांनी सापळा लावून मोठ्या शिताफीने आरोपीला पकडले आहे. वाघमारेला अटक करून रविवारी न्यायलायात हजर करण्यात आले. त्याला 11 सप्टेंबरपर्यंत पोलीस कोठडीत ठेवण्याचे आदेश न्यायालयाने दिले आहेत.

दरम्यान, सहा ते सात टू व्हीलरवरुन तेरा ते चौदा जण आले आणि त्यांनी थेट वनराज आंदेकर यांच्यावर गोळीबार आणि कोयत्याने वार केले होते. गंभीर जखमी झालेल्या आंदेकर यांना तातडीने रुग्णालयात दाखल करण्यात आले. हल्लेखोर घटनास्थळावरुन फरार झाले होते. सध्या हे प्रकरण गुन्हे शाखेकडे वर्ग करण्यात आले असून, पोलिसांकडून कसून तपास सुरू आहे.