अमित शहा यांच्या दौऱ्यामुळे पुणे शहरातील वाहतुकीत मोठे बदल... - पोलीसकाका

पुणे : केंद्रीय गृहमंत्री अमित शहा हे पुणे शहराच्या दौऱ्यावर असून, पुणे शहरात वाहतुकीत तात्पुरते बदल करण्यात आले आहेत. हे बदल 4 जुलै 2025 रोजी पुणे शहरातील बंडगार्डन, काळेपडळ, कोंढवा व भारती विद्यापीठ वाहतूक विभागांतर्गत लागू असतील. याबाबतचे आदेश पुणे शहर वाहतूक शाखेचे उपआयुक्त हिंमत जाधव यांनी जारी केले आहेत.

बंडगार्डन वाहतूक विभागातील मोर ओढा ते सर्किट हाऊस चौक ते आय.बी. चौक या मार्गावरील वाहतूक व्यवस्थेत आवश्यकतेनुसार बदल करून एकेरी वाहतूक दुतर्फा करण्यात येणार आहे. याशिवाय काळेपडळ, कोंढवा व भारती विद्यापीठ वाहतूक विभागांतर्गत दुपारी १२ वाजल्यापासून ते सायंकाळी ५ वाजेपर्यंत मोठ्या वाहनांना वाहतुकीस बंदी घालण्यात आली आहे. यामध्ये मंतरवाडी फाटा ते खडी मशिन चौक ते कात्रज चौक या रस्त्यांवरून जाणाऱ्या सर्व मालवाहतूक करणाऱ्या वाहनांना जसे की डंपर, मिक्सर, ट्रक, जड व अवजड वाहने, तसेच धीम्या गतीने जाणारी (स्लो मुव्हिंग) वाहने यांना प्रवेश नाकारण्यात आला आहे.

संबंधित मार्गांवरील रहदारीत काही प्रमाणात बदल होणार असल्याने नागरिकांनी पर्यायी मार्गांचा वापर करावा, असे आवाहन वाहतूक विभागाकडून करण्यात आले आहे. पुणे शहरात कायदा व सुव्यवस्था अबाधित राखण्यासाठी हे बदल केवळ तात्पुरते स्वरूपाचे असून, त्याची अंमलबजावणी आजच्या (शुक्रवार) दिवसासाठी मर्यादित असेल.

राज्यातील वरिष्ठ पोलीस अधिकार्यांच्या बदल्या, पाहा नावे…

राज्यात ऑक्टोबरमध्ये होणार १० हजार पोलिसांची भरती…