मोठा निर्णय! बिश्नोई गँग दहशतवादी संघटना म्हणून घोषित…
टोरंटो: कॅनडा सरकारने लॉरेन्स बिश्नोई म्होरक्या असलेल्या बिश्नोई गँगला दहशतवादी संघटना म्हणून घोषित केले आहे. कंझर्व्हेटिव्ह आणि एनडीपी नेत्यांच्या मागणीनंतर हा निर्णय घेतला असून, या निर्णयानुसार, आता कोणत्याही कॅनेडियन नागरिकाने या टोळीला आर्थिक मदत करणे किंवा टोळीसोबत काम करणे हा गुन्हा ठरणार आहे.
बिश्नोई गँगचा म्होरक्या लॉरेन्स बिश्नोई तुरुंगातून मोबाईल फोनद्वारे या टोळीच्या कारवाया नियंत्रित करतो, असा आरोप आहे. कॅनडाच्या सरकारने एका प्रेस रिलीजमध्ये म्हटले आहे की, बिश्नोई गँग ही टोळी खून, गोळीबार, जाळपोळ आणि खंडणीमध्ये सहभागी आहे, विशेषतः भारतीय वंशाच्या लोकांना, त्यांच्या व्यवसायांना आणि सांस्कृतिक ठिकाणांना या टोळीकडून लक्ष्य केले जात आहे. बिश्नोई गँगला दहशतवादी संघटना घोषित केल्यामुळे आता कॅनेडियन तपास यंत्रणांना या टोळीविरुद्ध अधिक कठोर कारवाई करण्याचा मार्ग मोकळा झाला आहे. तपास यंत्रणांकडून बिश्नोई गँगशी संबंधित लोकांची मालमत्ता जप्त करणं, त्यांची बँक खाती गोठवणे आणि त्यांच्या समर्थकांवर खटला चालवणे, अशा कारवाया केल्या जाऊ शकतात. कॅनेडियन नागरिकाने या टोळीला प्रत्यक्ष किंवा अप्रत्यक्षपणे पाठिंबा देणे किंवा त्यांच्याशी मालमत्तेचा कसलाही व्यवहार करणे, हा गुन्हा ठरणार आहे.
कॅनडाच्या सरकारने म्हटले आहे की, बिश्नोई गँगबाबत घेतलेल्या निर्णयामुळे केवळ गुन्हेगारीला आळा बसणार नाही, तर भारतीय स्थलांतरित लोकांमध्ये देखील सुरक्षिततेची भावना निर्माण होईल. सार्वजनिक सुरक्षा मंत्री गॅरी आनंदसांगारी यांनी एका निवेदनात म्हटले आहे की, “कॅनडामध्ये हिंसाचार आणि दहशतवादाला कोणतेही स्थान नाही, विशेषतः जेव्हा एखाद्या विशिष्ट समुदायाला भीती आणि दहशतीच्या वातावरणात जगण्यास भाग पाडले जाते.”
दरम्यान, गेल्या वर्षी, आरसीएमपीने दावा केला होता की भारत कॅनडामध्ये खून आणि खंडणी करण्यासाठी बिश्नोई टोळीचा वापर करत आहे, विशेषतः खलिस्तान चळवळीला पाठिंबा देणाऱ्यांना लक्ष्य करत आहे. तथापि, नवी दिल्लीने हे आरोप फेटाळून लावले आणि टोळीच्या आर्थिक कारवाया रोखण्यासाठी कॅनडासोबत काम करत असल्याचे सांगितले.
मुंबई पोलिसांनी हत्येचा कट उधळला; बिश्नोई गँगच्या 5 जणांना अटक…
सदस्यांची यादी तयार करणाऱ्या लॉरेन्स बिश्नोई गँगवर पुणे पोलिसांची कारवाई
अभिनेता सलमान खान याला पुन्हा एकदा जीवे मारण्याची धमकी…
अभिनेता सलमान खान याची सुपारी घेणाऱ्याला पानिपतमधून केली अटक…
अभिनेता शाहरुख खानला सरकारने पुरवली Y+ स्कॉट सुरक्षा; कारण…
