बडतर्फ IAS पूजा खेडकर अटकेच्या भीतीने दुबईला पळाली? पोलिसांकडून शोध सुरू... - पोलीसकाका

पुणे : बडतर्फ आयएएस पूजा खेडकर हिचा अटकपूर्व जामीन फेटाळल्यानंतर दिल्लीतच असलेली पूजा खेडकर आता दुबईला पळाल्याचा संशय तपास यंत्रणांना आहे. पूजा खेडकर अटकेच्या भीतीने दुबईला पळाली असल्याची शक्यता वर्तवण्यात येत आहे.

पूजा खेडकर हिचा अटकपूर्व जामीन फेटाळल्यानंतर दिल्ली आणि पुणे पोलिस तिच्या मागावर होते. दिल्ली पोलिसांकडून पूजा खेडकरचा शोध सुरू आहे. पूजा खेडकर हिने तब्बल सात वेळा आपल्या नावात फेरफार करून यूपीएससीची परीक्षा दिल्याचे समोर आले आहे. इंग्रजी भाषेमधून नाव देताना पूजा खेडकरने अनेक वेळा स्वतःच्या नावाचे स्पेलिंग बदलून हा सगळा प्रकार केल्याचे दिल्ली पोलिसांच्या तपासातून आता समोर आले आहे. त्यामुळे आता पूजा खेडकरच्या अडचणीत आणखी वाढ होण्याची शक्यता आहे.

पूजा खेडकरने यूपीएससी परीक्षेसाठी नाव लिहिताना सातवेळा फेरफार केल्याच् उघडकीस आले आहे. शिवाय, वडिलांच्या नावांमध्ये सुद्धा फेरफार केल्याचे समोर आले आहे. पूजा खेडकरचा जामीन अर्ज देखील न्यायालयाने फेटाळला आहे. पूजा खेडकरचे विविध कारनामे समोर येत असल्याने दिवसेंदिवस अडचणीत आणखी वाढ होताना दिसत आहे.

दरम्यान, पूजा खेडकर यांनी पहिल्यांदा यूपीएससीची परीक्षा दिली तेव्हा त्यांनी आपले नाव खेडकर पूजा दिलीपराव असे लिहीले होते. दुसऱ्यावेळेला त्यांनी आपल्या नावाचा उल्लेख पूजा दिलीप खेडकर असा केला. तर काही ठिकाणी त्यांच्या नावाचा उल्लेख पूजा मनोरमा दिलीप खेडकर असा देखील आढळून आला आहे.