साहिल वाकोडेच्या आई-वडिलांचे आझाद मैदानावर उपोषण सुरू; जबाबदार व्यक्तींवर कारवाईची मागणी…
मुंबई: आयआयटी मुंबईचा विद्यार्थी साहिल वाकोडेच्या मृत्यूबाबत प्रा. सूर्यनारायण दुल्ला यांच्यासह सर्व जबाबदार व्यक्तींवर कारवाई करण्यात यावी, या मागणीसाठी त्याच्या आई-वडिलांनी आझाद मैदानावर उपोषण सुरू केले आहे. मुंबई गुन्हे शाखा या प्रकरणाचा तपास करत आहे.
साहिल वाकोडे हा आयआयटी मुंबईमध्ये बी.टेकच्या दुसऱ्या वर्षाचा विद्यार्थी होता. १८ सप्टेंबर रोजी, मध्य-सत्र परीक्षेदरम्यान मोबाईल फोन वापरल्याच्या आरोपावरून त्याची चौकशी करण्यात आली. सीसीटीव्ही फुटेजनुसार, तो दुपारी १२:३० ते १२:४५ च्या दरम्यान परीक्षा हॉलमधून बाहेर पडला. काही तासांनंतर तो त्याच्या वसतिगृहातील खोलीत मृतावस्थेत आढळला. आयआयटी मुंबईने सुरुवातीला सांगितले की, परीक्षेदरम्यान साहिलकडे फोन आढळला होता आणि चॅटजीपीटीवर प्रश्नपत्रिका अपलोड केल्याचा त्याच्यावर आरोप होता. नंतर संस्थेने ही माहिती ज्या पद्धतीने सार्वजनिक करण्यात आली त्याबद्दल माफी मागितली आणि म्हटले की, तपास पूर्ण होण्यापूर्वी ही घटना अशा प्रकारे मांडणे अयोग्य होते.
साहिलच्या पालकांनी आरोप केला आहे की, त्यांच्या मुलाला कॅम्पसमध्ये जातीय भेदभाव आणि मानसिक दबावाचा सामना करावा लागला. कुटुंबीयांनी प्राध्यापक सूर्यनारायण दुल्ला आणि आयआयटी मुंबईचे संचालक शिरीष केदारे यांच्यावर कारवाई करण्याची मागणी केली आहे. साहिलच्या वडिलांनी आरोप केला आहे की, त्यांच्या मुलाला जातीयवादी टिप्पणी आणि धमक्यांचा सामना करावा लागला. तथापि, आयआयटी मुंबईने जातीय भेदभावाचे आरोप फेटाळून लावले आहेत. संस्थेच्या म्हणण्यानुसार, साहिलने प्रशासनाकडे किंवा संस्थेच्या एससी-एसटी सेलकडे अशी कोणतीही तक्रार दाखल केली नव्हती. या आरोपांची चौकशी सध्या सुरू आहे.
आयआयटी मुंबईमधील विद्यार्थ्यांनी या घटनेच्या निषेधार्थ प्राध्यापक दुल्ला यांच्यावर कारवाई करण्याची मागणी केली. यानंतर, संस्थेने दुला यांना रजेवर पाठवले आणि साहिलच्या मृत्यूच्या सभोवतालच्या परिस्थितीची चौकशी करण्यासाठी १० सदस्यीय समिती स्थापन केली. त्यांना प्रशासकीय कामकाज विभागाच्या डीन पदावरूनही हटवण्यात आले.
