सराईत गुन्हेगार वैभव इक्करची हवेली पोलिसांनी काढली धिंड…
पुणे (संदीप कद्रे): खडकवासला येथील हॉटेलमध्ये तोडफोड करत लूटमार करणारा सराईत गुन्हेगार वैभव इक्कर याची हवेली पोलिसांनी धिंड काढली. आपण पोलिस काय कोणाच्या बापाला घाबरत नाही असे म्हणत तो खडकवासला-किरकटवाडी शीव रस्ता परिसरात दहशत माजवित होता. त्या रस्त्यावरून त्याची धुलाई करत धिंड काढण्यात आली.
व्हडिओ पाहण्यासाठी इथे क्लिक करा
वैभव इक्कर (वय 23 रा. कोल्हेवाडी, खडकवासला) असे धुलाई करून धिंड काढलेल्या गुन्हेगाराचे नाव आहे. रविवारी (ता. 23) त्याने किरकिटवाडी परिसरात साथीदारांच्या मदतीने हॉटेलची तोडफोड करत लुटमार केली होती. यावेळी त्याने पोलिस कर्मचाऱ्यांवर हल्ला देखील केला होता. तोडफोड केलेल्या हॉटेल व्यावसायिकाने हवेली पोलिसात तक्रार दाखल केली होती. त्यावरून पोलिसांनी सराईत गुन्हेगार वैभव इक्कर व त्याचा साथीदार चेतन चोरघे यांच्यावर गुन्हा दाखल केला होता. त्यानुसार पोलिसांनी मंगळवारी संध्याकाळी वैभव इक्कर आणि त्याच्या साथीदाराला बेड्या ठोकल्या.
वैभव इक्कर याने ज्या हॉटेलची तोडफोड केली होती, त्याठिकाणी त्याला आणून त्याची चांगलीच धुलाई केली. शिवाय, ज्या रस्त्यावर त्याने दहशत माजवली होती. त्याच रस्त्यावरून त्याची धिंड काढली. गेल्या काही दिवसांपासून तो सामान्य नागरिकांना कुठल्या न कुठल्या कारणाने त्रास देण्याचे काम करत होता. मात्र, पोलिसांनी त्याची दहशत मोडून काढली आहे.
वैभव इक्कर आणि त्याच्या साथीदारांवर केलेल्या कारवाईमुळे पोलिसांचे नागरिकांनी कौतुक केले आहे. हवेली पोलिस ठाण्याचे प्रभारी अधिकारी अनमोल मित्तल व इतर कर्मचाऱ्यांचे या कारवाईबद्दल कौतुक केले जात आहे.
Video: नाशिक पोलिसांनी गुंडाची काढली धिंड…
Video: पुणे शहरात कोयता गॅंगने काढले पुन्हा डोके वर…
