मोक्का ९५! 'तु मोठा भाई झाला का, तुझा गेमच करतो' म्हणणाऱ्या टोळीवर मोक्का... - पोलीसकाका

पुणे : पुणे शहरात दोघांवर धारदार हत्याराने हल्ला करुन जीवे मारण्याचा प्रयत्न करणाऱ्या अमर जमादार व त्याच्या इतर तीन साथीदारांवर पोलिस आयुक्त रितेश कुमार यांनी मोक्का कायद्यांतर्गत कारवाई केली आहे. पोलिस आयुक्त रितेश कुमार यांनी आतापर्यंत शहरातील ९५ टोळ्यांविरुद्ध मोक्का अंतर्गत कारवाई केली आहे.

‘तु मोठा भाई झाला का, तुझा गेमच करतो’ असे म्हणत चार जणांच्या टोळक्याने दोघांना धारदार हत्याराने मारहाण करुन जखमी केले. तसेच हवेत हत्यारे फिरवून परिसरात दहशत निर्माण केली. याप्रकरणी अमर बसवराज जमादार (वय 20 रा. गोपाळपट्टी, मांजरी), अमन अशोक नरोटे (वय 19), श्रीपती संतोष सरोदे (वय 19) यांना अटक केली असून, अल्पवयीन मुलाला ताब्यात घेतले आहे. आरोपींवर आयपीसी 307, 341, 324, 323, 504, 506, 427, 34, आर्म अॅक्ट (Arm Act), महाराष्ट्र पोलिस अॅक्ट, क्रिमिनल लॉ अमेंडमेंट अॅक्ट नुसार गुन्हा दाखल केला आहे. याबाबत अमोल राजाराम घाटे (वय-25 रा. विठ्ठल मंदिराजवळ, माळवाडी, हडपसर) यांनी हडपसर पोलिस ठाण्यात फिर्याद दिली आहे. हा प्रकार 10 नोव्हेंबर रोजी माळवाडी परिसरात घडला होता.

पोलिस आयुक्त रितेश कुमार यांनी पुणे शहर पोलिस आयुक्तालयाचा कार्यभार घेतल्यानंतर गुन्हेगारी नियंत्रणावर बारकाईने लक्ष देवुन, शरिराविरुध्द व मालमत्तेविरुध्द गुन्हे करणारे व नागरीकांमध्ये दहशत निर्माण करणारे सराईत गुन्हेगार यांचे हालचालीवर बारकाईने लक्ष ठेवुन, गुन्हेगारीचे समुळ उच्चाटन होईल यावर भर देण्याबाबत सर्व पोलिस अधिकारी व अंमलदार यांना निर्देश देण्यात आले आहेत. त्यांचे मार्गदर्शना खाली मकोका अंतर्गत केलेली ही ९५वी कारवाई आहे.