दहशतवाद्यांना वित्तसाह्य करणाऱ्या लष्कर-ए-तय्यबाशी संबंधितांवर काश्मीरमध्ये चार ठिकाणी ईडीचे छापे…

श्रीनगर: बंदी घातलेल्या लश्कर-ए-तय्यबा या संघटनेशी संबंधित असलेल्या दहशतवादी वित्तपुरवठा नेटवर्कच्या सुरू असलेल्या तपासाचा भाग म्हणून, अंमलबजावणी संचालनालयाने मंगळवारी श्रीनगरमधील चार ठिकाणी छापे घातल्याची माहिती, येथील अधिकाऱ्यांनी दिली.

संशयित आर्थिक नेटवर्क ओळखणे, निधीच्या स्रोतांचा मागोवा घेणे आणि चौकशीखाली असलेल्या व्यक्ती व सीमेपलीकडून कार्यरत असलेले सूत्रधार यांच्यातील संभाव्य संबंध तपासणे, हे या शोधमोहिमांचे उद्दिष्ट आहे.

अधिकाऱ्यांनी दिलेल्या माहितीनुसार, श्रीनगरचा रहिवासी उमर आदिल दार हा बंदी घातलेल्या संघटनेसाठी ओव्हर ग्राउंड वर्कर म्हणून काम करत होता आणि संघटनेशी संबंधित कार्यात सामील होता. ईडीने या आरोपांवर तपास केंद्रित केला आहे.

एका वरिष्ठ पोलीस अधिकारी म्हणाले, की दार आणि त्याच्या काही साथीदारांना यापूर्वी बंदी घातलेल्या संघटनेशी संबंधित मोठ्या प्रमाणात रोकड आणि साहित्य बाळगल्याच्या आरोपाखाली अटक करण्यात आली होती. जम्मू आणि काश्मीरमधील फुटीरतावादी आणि भारतविरोधी कारवायांमध्ये सहभाग असल्याच्या एका प्रकरणात दार याने चार वर्षांचा तुरुंगवास भोगला होता.

मंगळवारच्या शोधमोहिमेदरम्यान ईडीचे अधिकारी संशयास्पद आर्थिक व्यवहार आणि निधीपुरवठ्याच्या संभाव्य मार्गांची तपासणी करत आहेत. संघटनेशी संबंधित कारवायांना पाठिंबा देण्यासाठी पैशांचा वापर केला जात होता का, हे निश्चित करता येईल. गुन्ह्यातून मिळालेल्या उत्पन्नाची आणि सीमेपलीकडील सूत्रधारांशी असलेल्या संभाव्य आर्थिक संबंधांचीही चौकशी करण्यात येत आहे.

या प्रदेशात दहशतवादाशी संबंधित कारवायांना कथितपणे पाठिंबा देणाऱ्या संशयित आर्थिक पायाभूत संरचनेच्या चालू असलेल्या तपासाचा भाग म्हणून ही शोधमोहीम राबवण्यात येत आहे.

हिवाळी सुरक्षा धोरणांतर्गत सुरक्षा व्यवस्था अधिक मजबूत करण्यासाठी पोलिसांनी प्रयत्न तीव्र केल्यामुळे, श्रीनगर आणि लगतच्या जिल्ह्यांमध्ये सुरक्षेचा आढावा वाढवला जात असतानाच ही घडामोड समोर आली आहे.

काश्मीर विभागाचे पोलीस महानिरीक्षक सुजित कुमार यांनी श्रीनगरमधील कार्गो येथे श्रीनगर शहर सुरक्षा व्यवस्थेचा आढावा घेणाऱ्या बैठकीचे अध्यक्षस्थान भूषवले. या बैठकीला मध्य काश्मीर विभाग आणि दक्षिण काश्मीर विभागाचे पोलीस उपमहानिरीक्षक, श्रीनगर, बडगाम, गंदरबल आणि पुलवामाचे वरिष्ठ पोलीस अधीक्षक, अवंतीपुराचे एसएसपी, संबंधित विभागीय एसपी आणि विशेष कृती गटाचे एसपी उपस्थित होते.

या बैठकीत सध्याच्या सुरक्षा परिस्थितीचा, श्रीनगर आणि शेजारील जिल्ह्यांसंबंधीच्या धोक्याच्या माहितीचा, तसेच विद्यमान सुरक्षा यंत्रणा अधिक मजबूत करण्याच्या उपाययोजनांचा आढावा घेण्यात आला. झेलम कॉरिडॉरवरील, विशेषतः पुलवामा आणि अवंतीपुरा येथील सुरक्षा व्यवस्था आणि सुरू असलेल्या कार्यवाहीवरही चर्चा झाली. आयजीपींनी जिल्ह्यांमध्ये उत्तम समन्वय आणि हिवाळी सुरक्षा धोरणाच्या प्रभावी अंमलबजावणीच्या गरजेवर भर दिला.