दिवाळीच्या फटाक्यांवरून झालेल्या वादात, राष्ट्रपतींच्या अंगरक्षकाच्या डोक्यात शेजाऱ्याने घातली गोळी…

लखनऊः उत्तर प्रदेशातील बागपत जिल्ह्यात दिवाळीच्या दिवशी फटाके उडवण्यावरून शेजाऱ्यासोबत झालेल्या वादावादीत, दिल्लीतील राष्ट्रपती भवनात तैनात असलेल्या एका सुरक्षा कर्मचाऱ्याच्या डोक्याला गोळी लागली. सणासुदीच्या सुट्ट्यांसाठी आपल्या गावी परतलेला हा कर्मचारी गोळीबारात जखमी झाला, असे पोलिसांनी सांगितले.

अंगरक्षक सौरभ कुमार हा आपल्या भावांसोबत घराबाहेर फटाके उडवत असताना हा वाद झाला. त्याला तातडीने वैद्यकीय उपचारांसाठी दाखल करण्यात आले आणि त्यानंतर डॉक्टरांनी त्याच्या शरीरातून गोळी काढली आहे. बागपतचे पोलीस अधीक्षक पूर्णेंदू सिंह यांनी सांगितले की, गोळी कुमार यांना लागण्यापूर्वी आधी भिंतीला आदळल्याने तिचा वेग कमी झाला होता. त्यांची प्रकृती आता स्थिर आहे.

कुमारचे वडील जनक राज यांनी रामाला पोलीस ठाण्यात दाखल केलेल्या तक्रारीनुसार, ही घटना गोपालपूर खडाना गावात रात्री ९ वाजण्याच्या सुमारास घडली. कुमार त्याचे भाऊ विनीत आणि मिंटू यांच्यासोबत दिवाळी साजरी करत होता, तेव्हा त्यांचा शेजारी धीरज तिथे आला आणि फटाके उडवण्यावरून त्यांना शिवीगाळ करू लागला.

जवळपास १०० मीटर अंतरावर राहणाऱ्या धीरजने या प्रकाराला आक्षेप घेतल्याने वाद सुरू झाला. काही गावकऱ्यांनी हस्तक्षेप करून सुरुवातीला दोन्ही बाजूंना शांत केले असले तरी, कुमारने विरोध केल्यानंतर परिस्थिती पुन्हा बिघडली, असा आरोप तक्रारीत करण्यात आला आहे.

धीरजने गावठी पिस्तूलातून गोळीबार केला. गोळी भिंतीला लागून कुमारच्या डोक्यात लागली. एका वेगळ्या हल्ल्यात, धीरजचा भाऊ मोनु ऊर्फ प्रवीण याने विनीतला काठीने मारहाण केली. तक्रारीनुसार, त्यानंतर दोन्ही आरोपींनी कुटुंबाला धमकावून पळ काढला. जनक राज यांच्या तक्रारीच्या आधारे पोलिसांनी धीरज आणि मोनू यांच्या विरोधात गुन्हा दाखल केला आहे. आरोपींचे त्यांच्याशी दीर्घकाळापासून वैर होते, असा आरोपही कुटुंबीयांनी केला आहे, असे एसपी पूर्णेंदू सिंह यांनी सांगितले.

रामाला पोलीस ठाण्याचे अधिकारी राकेश कुमार शर्मा यांनी सांगितले, की आरोपीचा शोध घेऊन त्याला अटक करण्यासाठी तीन पोलीस पथके तयार करण्यात आली आहेत. पुढील कोणताही अनुचित प्रकार टाळण्यासाठी आणि कायदा व सुव्यवस्था राखण्यासाठी गावात कर्मचारीही तैनात करण्यात आले आहेत. कुमार हे राष्ट्रपती भवनात भारताच्या राष्ट्रपतींच्या संरक्षणाची जबाबदारी असलेल्या विशेष सुरक्षा पथकाचा भाग आहेत, असे एसपींनी सांगितले.

ते राष्ट्रपतींच्या अंगरक्षक दलाचे सदस्य आहेत, जी १७७३ मध्ये स्थापन झालेली एक विशेष घोडदळ पलटण आहे. ही भारतीय लष्कराच्या सर्वात जुन्या पलटणांपैकी एक असून, तिच्यावर राष्ट्रपतींशी संबंधित समारंभिक आणि सुरक्षाविषयक कर्तव्ये सोपवली जातात.