मुंबईच्या आलिशान हॉटेलात वेश्याव्यवसाय, पोलिसांकडून दोन अभिनेत्रींची सुटका…
मुंबई: मुंबई पोलिसांनी शहराच्या दक्षिण भागातील एका आलिशान हॉटेलमध्ये चालणाऱ्या एका हाय-प्रोफाईल सेक्स रॅकेटचा पर्दाफाश केला आहे. या कारवाईदरम्यान, पोलिसांनी चित्रपट आणि टीव्ही उद्योगातील दोन अभिनेत्रींची सुटका केली. हे संपूर्ण रॅकेट चालवल्याच्या आरोपाखाली एका महिला मेकअप आर्टिस्टला अटक करण्यात आली आहे.
ही घटना मुंबईतील गिरगाव भागातील आहे, एका आलिशान हॉटेलमध्ये बऱ्याच काळापासून वेश्याव्यवसायाचे रॅकेट चालवले जात होते. पोलिसांच्या म्हणण्यानुसार, एक मेकअप आर्टिस्ट या रॅकेटची सूत्रधार आहे. चित्रपट आणि जाहिरातींमध्ये काम देण्याच्या बहाण्याने, आर्थिक अडचणीत असलेल्या अभिनेत्री आणि मॉडेल्सना वेश्याव्यवसायात ओढत असे. त्यानंतर ती मोठ्या रकमेच्या बदल्यात त्यांना वेश्याव्यवसाय करण्यास भाग पाडत असे. ही मेकअप आर्टिस्ट आपल्या ग्राहकांकडून गोळा केलेल्या मोठ्या रकमेतील मोठा हिस्सा स्वतःकडे ठेवत असे.
मुंबई पोलिसांच्या मानवी तस्करी विरोधी पथकाला गिरगावमधील या हॉटेलमध्ये एक मोठे रॅकेट चालत असल्याची माहिती मिळाली. या माहितीची सत्यता पडताळण्यासाठी पोलिसांनी एक सुनियोजित बनाव आखला. त्याचाच एक भाग म्हणून, मेकअप आर्टिस्टशी संपर्क साधण्यासाठी एका बनावट ग्राहकाला पाठवले. हा ग्राहक हॉटेलमध्ये जाऊन आरोपीसोबत सौदा निश्चित केल्यानंतर आणि वेश्याव्यवसाय चालतो याची पुष्टी होताच, पोलिस पथकाने हॉटेलवर अचानक छापा टाकला.
एका अधिकाऱ्याने दिलेल्या माहितीनुसार, छाप्यादरम्यान घटनास्थळावरून दोन पीडित अभिनेत्रींची सुटका करण्यात आली. वेश्याव्यवसाय आणि मानवी तस्करीमध्ये सहभागी असल्याचे आढळलेल्या एका महिला मेकअप आर्टिस्टला रंगेहाथ अटक करण्यात आली. या रॅकेटमध्ये इतर व्यक्ती किंवा दलालांचा सहभाग होता का, आणि हॉटेल व्यवस्थापनही यात सामील होते का, याचा तपास आता चालू आहे. सुटका झालेल्या अभिनेत्रींना सुधारगृहात पाठवण्यात आले आहे.
