‘मुलीला घेऊन जा, नाहीतर…,’ जावयाचा रात्री फोन अन् काही तासांत आयटी अभियंता वैष्णवीचा मृत्यू; हुंड्यासाठी छळाचा आरोप…
पुणे: लग्नाला अवघे चार महिने झाले होते. वय अवघे २३ वर्षे आणि आयटी क्षेत्रात नोकरी. नव्या संसाराची सुरुवात झालेल्या वैष्णवी प्रवीण जरांडे हिचा पुण्यातील उंड्री-वडाचीवाडी परिसरातील सासरी मृत्यू झाल्याने, तिच्या कुटुंबावर दुःखाचा डोंगर कोसळला आहे. २४ सप्टेंबरच्या रात्री मृत्यूपूर्वी वैष्णवीने आईला फोन करून सासरी होत असलेल्या कथित त्रासाबाबत सांगितल्याचे कुटुंबीयांचे म्हणणे आहे. त्याच रात्री तिच्या पतीनेही माहेरच्यांना फोन केला. त्यानंतर वैष्णवीशी संपर्क होत नसल्याने आई-वडील पुण्याकडे निघाले. मात्र, पुण्यात पोचल्यानंतर त्यांना वैष्णवीच्या मृत्यूची माहिती मिळाली. वैष्णवीने आत्महत्या केल्याचे समोर आले असून, हुंड्यासाठी तिचा मानसिक आणि शारीरिक छळ झाल्याचा आरोप कुटुंबीयांनी केला आहे.
वैष्णवीचा विवाह ९ मे २०२६ रोजी ओंकार संजय घिसरे याच्याशी झाला होता. कुटुंबीयांच्या म्हणण्यानुसार, लग्नासाठी सुमारे ४५ लाख रुपये खर्च करण्यात आला होता. तसेच १० तोळे सोनेही देण्यात आले होते. मात्र, लग्नानंतर कार खरेदीसाठी माहेरहून आणखी ५ लाख रुपये आणावेत, अशी मागणी केली जात असल्याचा आरोप कुटुंबीयांनी केला आहे. पतीसह सासू-सासऱ्यांकडून वैष्णवीचा मानसिक आणि शारीरिक छळ होत असल्याचेही तक्रारीत म्हटले आहे.
लग्नानंतर काही काळ वैष्णवी सासरी राहिली. त्यानंतर नोकरीनिमित्त ती बंगळुरूला गेली होती. जूनच्या अखेरीस ती पुन्हा पुण्यात आली आणि सासरी राहून आयटी कंपनीसाठी वर्क फ्रॉम होम करत होती. याच काळात कारसाठी माहेरहून ५ लाख रुपये आणण्याच्या मागणीवरून तिचा छळ सुरू असल्याचा आरोप कुटुंबीयांनी केला आहे.
२४ सप्टेंबरच्या रात्री वैष्णवीने आईशी फोनवर संवाद साधला आणि सासरी होत असलेल्या कथित त्रासाबाबत सांगितले. त्याच रात्री साडेअकराच्या सुमारास तिच्या पतीनेही माहेरच्यांना फोन केला. तुमच्या मुलीला ताबडतोब घरी घेऊन जा, नाहीतर माझ्या हातून काहीतरी बरेवाईट घडेल, अशी धमकी त्याने दिल्याचा कुटुंबीयांचा आरोप आहे. त्यानंतर वैष्णवीशी संपर्क होऊ शकला नाही. त्यामुळे तिचे आई-वडील तातडीने पुण्याकडे निघाले. मात्र, पुण्यात पोहोचल्यानंतर त्यांना वैष्णवीचा मृत्यू झाल्याचे समजले.
पुणे! सोन्याची अंगठी दिली तरच जेवायला येऊ; विवाहितेची आत्महत्या…
पुणे! भाऊबीजेच्या दुसऱ्या दिवशी भावाची आत्महत्या; ताई त्यांना सोडू नको…
पुणे! प्रेमाच्या त्रिकोणातून नवविवाहितेची गळफास घेत आत्महत्या…
पुणे! प्रेमप्रकरणातून महिलेची आत्महत्या; कागदाचे तुकडे जोडत पोलिसांनी उकललं गूढ…
पुणे! IT इंजिनिअरची सातव्या मजल्यावरून उडी घेत आत्महत्या; प्रेमप्रकरण की तणाव…
