प्रशिक्षणार्थी IPS अधिकाऱ्याविरुद्ध गंभीर आरोप; कंडोम फेकले अन्…
हैदराबाद (तेलंगणा): हैदराबाद येथील सरदार वल्लभभाई पटेल राष्ट्रीय पोलिस अकादमी (SVPNPA) मधील एका प्रशिक्षणार्थी IPS अधिकाऱ्याविरुद्ध एका महिला प्रशिक्षणार्थी अधिकाऱ्याचा विनयभंग, मारहाण आणि ब्लॅकमेल केल्याप्रकरणी गुन्हा दाखल करण्यात आला आहे. यामुळे खळबळ उडाली असून, पुढील तपास सुरू आहे.
पीडितेच्या आरोपानुसार, आरोपीने तिला जबरदस्तीने त्याच्या खोलीत नेल्यानंतर मारहाण केली, तिच्या संमतीशिवाय तिचा व्हिडिओ रेकॉर्ड केला आणि तो व्हिडिओ तिच्या पतीला पाठवला. या तक्रारीनंतर, अत्तापूर पोलिस आरोपीचा शोध घेत आहेत. एफआयआरनुसार, महिला प्रशिक्षणार्थी अधिकाऱ्याने आरोप केला आहे की, आरोपी तिला 23 जूनपासून व्हॉट्सॲपवर अश्लील संदेश पाठवत होता. तो इतर प्रशिक्षणार्थी अधिकाऱ्यांसमोर तिच्याबद्दल अपमानजनक टिप्पणी करत असे आणि दुसऱ्या प्रशिक्षणार्थी अधिकाऱ्यासोबत तिचे प्रेमसंबंध असल्याचा खोटा आरोप करून तिला बदनाम करण्याचा प्रयत्न करत असे. 8 जुलै रोजी आरोपीने मोबाईल फोन हिसकावून घेतला आणि तिला त्याच्या खोलीत नेले. तिथे त्याने तिला धमकावले, तिच्या फोनचा पासवर्ड मागितला आणि जबरदस्तीने तिचे खाजगी चॅट्स व इतर वैयक्तिक माहिती मिळवण्याचा प्रयत्न केला. 9 जुलै रोजी आरोपीने तिला जबरदस्तीने त्याच्या खोलीत नेले. तिथे त्याने तिचे केस ओढले, तिचा गळा दाबण्याचा प्रयत्न केला, तिच्या गळ्यावर चाकू ठेवला आणि तिला खोलीतून बाहेर जाऊ दिले नाही. महिलेने असाही आरोप केला आहे की, आरोपीने तिच्यावर कंडोमची तीन पाकिटे फेकून तिचा अपमान केला.
View this post on Instagram
10 जुलै रोजी आरोपीने पुन्हा तिच्यावर हल्ला केला आणि तिचा विनयभंग केला. त्याने महिलेच्या संमतीशिवाय तिचा व्हिडिओ रेकॉर्ड केला आणि तिला ब्लॅकमेल करण्याच्या उद्देशाने तो तिच्या पतीला पाठवला. आरोपीने तिच्याबद्दल खोटी आणि बदनामीकारक माहिती पसरवणे सुरूच ठेवले. त्याने खासगी व्हिडिओ आणि अफवांच्या माध्यमातून तिची प्रतिमा मलीन करण्याचा आणि तिला मानसिक त्रास देण्याचा प्रयत्न केला. अनेक गंभीर कलमांखाली गुन्हा दाखल करण्यात आला असून, अकादमीनेही चौकशी सुरू केली आहे.
महिलेच्या तक्रारीच्या आधारे, अत्तापूर पोलिसांनी आरोपीविरुद्ध भारतीय दंड संहितेच्या (IPC) कलम 120 (लैंगिक छळ), 121 (पाठलाग करणे), 122 (गुन्हेगारी धमकी), 123 (स्त्रीची लज्जाभंग करण्याच्या उद्देशाने तिच्यावर हल्ला करणे किंवा गुन्हेगारी बळ वापरणे), 124 (बेकायदेशीरपणे डांबून ठेवणे) आणि माहिती तंत्रज्ञान कायद्यांतर्गत (IT Act) गुन्हा दाखल केला आहे.
दरम्यान, या प्रकरणाच्या दरम्यान, आरोपी प्रशिक्षणार्थी आयपीएस अधिकाऱ्याने 20 जुलै रोजी आत्महत्येचा प्रयत्न केला. तो त्याच्या भावाच्या फ्लॅटमध्ये बेशुद्ध अवस्थेत आढळला आणि त्यानंतर त्याला हैदराबादमधील एका खासगी रुग्णालयात दाखल करण्यात आले. त्याच्याजवळ दारू आणि सॅनिटायझरची बाटली आढळली. त्याने कोणत्याही विषारी पदार्थाचे सेवन केले होते की नाही, हे प्राथमिक तपासात उघड झाले नाही. आरोपीला नंतर डिस्चार्ज देण्यात आला आणि तेव्हापासून तो फरार आहे.
सोशल मीडियावर प्रसिद्ध केलेल्या एका निवेदनात, आरोपी प्रशिक्षणार्थी आयपीएस अधिकाऱ्याने सर्व आरोप खोटे आणि निराधार असल्याचे सांगत फेटाळून लावले. त्याने म्हटले आहे की, त्याचा तपास प्रक्रियेवर पूर्ण विश्वास आहे आणि तो तपास यंत्रणांना सहकार्य करेल. पोलिस पुढील तपास करत आहेत.
महिला IPSचे अश्लील Video काढून पतीला पाठवल्याचा गंभीर आरोप अन् आत्महत्येचा प्रयत्न…
महाराष्ट्राचे सुपूत्र IPS विनायक भोसले यांच्या उत्तर प्रदेशात धडाकेबाज कारवाया…
महाराष्ट्रातील सुपुत्र अखेरच्या प्रयत्नात झाला IPS अन् दिला राजीनामा…
जिद्दीच्या जोरावर बनला IPS; गावकऱ्यांनी काढली चक्क हत्तीवरून मिरवणूक…
IAS पत्नी जपान दौऱ्यावर असताना IPS अधिकाऱ्याची आत्महत्या…
Ex IPS शिवदीप लांडे यांची नवी इनिंग सुरू…
