हरयाणाच्या माजी मंत्र्याच्या घर, कार्यालय आणि फार्महाऊसवर अंमलबजावणी संचालनालयाचे छापे; २४८ कोटींचा घोटाळा!
नवीन गुरुग्राम: अंमलबारी संचालनालयाने (ईडी) वाटिका लिमिटेडशी संबंधित कथित रिअल इस्टेट घोटाळा आणि मनी लाँडरिंग प्रकरणात, हरियाणाचे माजी राज्यमंत्री गोपाल कांडा यांच्याशी संबंधित गुरुग्राममधील तीन ठिकाणांवर छापे टाकले.
‘ईडी’ अधिकाऱ्यांच्या म्हणण्यानुसार, मनी लाँडरिंग प्रतिबंधक कायद्याच्या (पीएमएलए) कलम १७ अंतर्गत ही कारवाई करण्यात आली आहे. गोपाल कांडा यांच्या निवासस्थानी, फार्महाऊस आणि कार्यालयाच्या परिसरात शोधमोहीम राबवण्यात आली.
‘ईडी’चा तपास वाटिका लिमिटेडच्या चार व्यावसायिक प्रकल्पांशी संबंधित आहे. तपासानुसार, या प्रकल्पांमध्ये गुंतवणूक करणाऱ्या गुंतवणूकदारांना वेळेवर ताबा, निश्चित परतावा, भाडेपट्टीचे भाडे आणि विक्री करारांची अंमलबजावणी करण्याचे आश्वासन देण्यात आले होते.
‘ईडी’च्या म्हणण्यानुसार, या चार प्रकल्पांमध्ये सुमारे ६६१ गुंतवणूकदारांकडून अंदाजे २४८.४६ कोटी रुपये उभारण्यात आले, परंतु अद्यापपर्यंत गुंतवणूकदारांना प्रकल्पांचा ताबा देण्यात आलेला नाही किंवा वचन दिल्याप्रमाणे विक्री करारही करण्यात आलेला नाही.
अधिकाऱ्यांच्या म्हणण्यानुसार, तपासात असे आर्थिक दुवे उघड झाले आहेत, ज्यावरून असे दिसून येते की गुंतवणूकदारांकडून मिळालेला निधी कथितरित्या गोपाल कांडा यांच्याशी संबंधित विविध कंपन्यांमध्ये हस्तांतरित करण्यात आला होता. या आर्थिक माहितीच्या आधारे, कांडा यांच्याशी संबंधित ठिकाणांवर शोधमोहीम राबवण्यात आली.
ही कारवाई ‘ईडी’च्या वाटिका ग्रुपविरुद्ध सुरू असलेल्या तपासाचाच एक भाग आहे. यापूर्वी, २५ ऑगस्ट २०२६ रोजी, ‘ईडी’च्या गुरुग्राम प्रादेशिक कार्यालयाने ‘पीएमएलए’ अंतर्गत दिल्ली-एनसीआरमधील वाटिका लिमिटेड आणि तिच्या प्रवर्तक-संचालकांच्या मालकीच्या सात निवासी आणि व्यावसायिक जागांवर शोधमोहीम राबवली होती. त्या शोध मोहिमेदरम्यान विविध कागदपत्रे आणि डिजिटल उपकरणे जप्त करण्यात आली होती.
‘ईडी’च्या म्हणण्यानुसार, तीन आलिशान वाहने, दागिने आणि सुमारे ३३ कोटी रुपयांची बँक खाती आणि सिक्युरिटीज देखील जप्त किंवा गोठवण्यात आली.
‘ईडी’ने ऑक्टोबर २०२४ मध्ये केलेल्या कारवाईत वाटिका लिमिटेड आणि इतरांविरुद्धच्या तपासाचा तपशीलही प्रसिद्ध केला होता. संस्थेच्या मते, हे प्रकरण गुंतवणूकदारांना वचन दिलेला, आश्वासित परतावा न मिळणे आणि व्यावसायिक युनिट्सचा ताबा न मिळण्याशी संबंधित आहे.
तपासात गुन्ह्यातून मिळालेली रक्कम सुमारे २५० कोटी रुपये असल्याचा अंदाज वर्तवण्यात आला असून, २०० कोटी रुपयांपेक्षा जास्त किमतीची मालमत्ता ओळखण्यात आल्याचे सांगण्यात आले आहे.
या प्रकरणातील ‘ईडी’चा तपास सुरू आहे. कांडाशी संबंधित असलेल्या परिसरांमध्ये सुरू असलेल्या झडतीदरम्यान कोणती कागदपत्रे किंवा इतर साहित्य जप्त करण्यात आले, याचा तपशील संस्थेने अद्याप जाहीर केलेला नाही.
तपासात समोर आलेल्या आरोपांची चौकशी अजूनही सुरू असून, संबंधित कायदेशीर प्रक्रिया पूर्ण झाल्यानंतरच अंतिम निष्कर्ष काढला जाईल.
