पुणे शहरात कोयता गँगने काढले पुन्हा डोके वर; पोलिसांनी काढली धिंड…
पुणे: पुणे शहरात कोयता गँगने पुन्हा डोके वर काढले असून, सलग दोन दिवस गाड्यांची तोडफोड करण्याचा धक्कादायक प्रकार घडला आहे. सोमवारी (ता. 19) भल्या पहाटे वारजे परिसरात पाच वाहनांच्या काचा फोडण्यात आल्या होत्या. मंगळवारी (20जून) तळजाई परिसरात पहाटे 30 गाड्या फोडण्यात आल्या आहेत. ही घटना वनशिव झोपडपट्टी परिसरात घडली असून, सहकार नगर पोलिसांकडून या प्रकरणात अधिक तपास सुरु आहे.
पुण्यातील कर्वेनगर भागातही सोमवारी रात्री चार टेम्पो आणि चार चारचाकी वाहनांची तोडफोड करण्यात आली. तोडफोड करणाऱ्या युवकांनी त्याआधी एका युवकावर कोयत्याने वारही केले होते. कर्वेनगर परिसारात तोडफोड करणाऱ्या आरोपींच्या पोलिसांनी मुसक्या आवळल्या आहेत. कर्वेनगरमध्ये पुन्हा गाड्यांची तोडफोड करणाऱ्या आरोपीची पोलिसांनी धिंड काढली.
वारजे रामनगर कॅनॉल रस्त्यावर नागेश्वर महादेव मंदिर येथे रस्त्याच्या कडेला उभ्या असलेल्या एकूण सात वाहनांवर लोखंडी कोयत्याने वार करुन काचा फोडून वाहनांचे नुकसान केल्याची घटना सोमवारी (ता.19) पहाटे चारच्या सुमारास घडली होती. काळ्या रंगाच्या अॅक्टिव्हा या दुचाकीवरुन गेलेल्या अज्ञात तीन व्यक्तींनी हा प्रकार केला असावा, अशी शक्यता नागरिकांनी वर्तवली आहे. याबाबत स्थानिक गाडी मालकांनी पोलीस नियंत्रण कक्षाला कळवले आहे.
दरम्यान, खासदार सुप्रिया सुळे यांनी ट्वीट करुन कोयता गँगवर कारवाई करण्याची मागणी केली आहे. त्यांनी ट्वीटमध्ये लिहिलेय की, ‘पुण्यामध्ये पुन्हा एकदा कोयता गँग कमालीची सक्रिय झाली आहे. या टोळीतील गुन्हेगार दिवसा देखील तोडफोड करतात. नागरिकांना धमकावून त्यांना मारहाण करतात. वारजे, पुणे येथेही या गँगने धुमाकूळ घालत गाड्यांच्या काचा फोडल्या. या घटनेबाबत पुण्याच्या पोलीस आयुक्तांशी सविस्तर चर्चा केली. माझी राज्याच्या गृहमंत्र्यांना विनंती आहे की, गेल्या काही दिवसांत पुणे आणि परिसरात वाढलेल्या गुन्हेगारीवर आळा घालणे अतिशय गरजेचे झाले आहे. पुण्यातील संघटित गुन्हेगारीवर कायमचा आळा घालण्यासाठी राज्याच्या गृहमंत्र्यांनी पुढाकार घेऊन उचित कार्यवाही करण्याचे आदेश द्यावेत.’
