पंजाब नॅशनल बँकेत १७ कोटी रुपयांच्या बनावट नोटा; ३ अधिकारी निलंबित…
सहारनपूरः उत्तर प्रदेशातील पंजाब नॅशनल बँकेच्या येथील सोफिया मार्केट शाखेच्या करन्सी चेस्टच्या ऑडिटमध्ये, १७ कोटी रुपयांच्या बनावट नोटा सापडल्याने खळबळ उडाली आहे. तपासात सहभाग असल्याचे उघड झाल्यानंतर तीन अधिकाऱ्यांना निलंबित करण्यात आले. प्राथमिक तपासात ७ कोटी रुपयांच्या बनावट नोटा आढळून आल्या होत्या.
बनावट चलन सापडल्याप्रकरणी पीएनबीचे मुख्य व्यवस्थापक आणि तपास अधिकारी अरुण कुमार चौबे यांनी तीन निलंबित अधिकाऱ्यांविरुद्ध गुन्हा दाखल केला आहे. रोख रकमेच्या तुटवड्याप्रकरणी अर्धवेळ सफाई कर्मचाऱ्याविरुद्धही चोरीचा गुन्हा दाखल करण्यात आला आहे.
बँक अधिकाऱ्यांच्या तपासासोबतच पोलिसांचाही तपास चालू आहे. काही दिवसांपूर्वी, अर्धवेळ सफाई कर्मचारी विशाल कुमार याला करन्सी चेस्टमध्ये नोटा रचून ठेवण्याची जबाबदारी देण्यात आली होती. त्यात फाटलेल्या, खराब झालेल्या आणि इतर नोटांचा समावेश होता. ५ ऑगस्ट रोजी ११.५ कोटी रुपयांच्या नोटा जयपूरच्या रिझर्व्ह बँक ऑफ इंडियामध्ये पाठवण्यात आल्या. तिथे मोजणी केल्यानंतर ४ लाख ३० हजार ९०० रुपये गायब असल्याचे आढळून आले.
त्यानंतर पीएनबी मेरठचे विभागीय प्रमुख अजय कुमार तिब्रेवाल यांना माहिती देण्यात आली. या प्रकरणाची चौकशी करण्यासाठी मुख्य व्यवस्थापक अरुण कुमार चौबे यांना मेरठहून सहारनपूरला पाठवण्यात आले. तपासात असे उघड झाले, की विशाल कुमारने नोटांच्या बंडलांमधून त्या काढल्या होत्या. सीसीटीव्ही फूटेजमध्ये ते स्पष्ट दिसले. या अनियमिततेसंदर्भात ९ ऑगस्ट रोजी ऑडिट सुरू झाले आणि तपासात असे उघड झाले, की बँकेत ११.५ कोटी रुपये किमतीच्या बनावट नोटा ठेवण्यात आल्या होत्या.
त्यानंतर तपास अधिकारी अरुण कुमार चौबे यांनी वरिष्ठ विभागीय व्यवस्थापक रवी कुमार कानसे, करन्सी चेस्ट व्यवस्थापक सुशील कुमार आणि हरियाणातील यमुनानगर जगधरी येथील करन्सी चेस्ट व्यवस्थापक अमित कुमार यांच्याशी संवाद साधला. अमित यांची सहारनपूर चेस्टमधून हरियाणा येथे बदली झाली होती. हे तिन्ही अधिकारी या प्रकरणी स्पष्ट उत्तर देऊ शकले नाहीत. अरुण कुमार चौबे यांनी याबद्दल बँकेच्या वरिष्ठांना माहिती दिली. २९ ऑगस्टच्या संध्याकाळी, त्यांनी सदर बाजार पोलिस ठाण्यात तिन्ही व्यवस्थापकांविरुद्ध गुन्हा दाखल करून तक्रार दाखल केली.
दिल्ली रोडवरील पीएनबीच्या विभागीय कार्यालयातील वरिष्ठ व्यवस्थापक निशा सिंग यांनी सांगितले, की हे प्रकरण उघडकीस आल्यानंतर तिन्ही व्यवस्थापकांना निलंबित करण्यात आले. तपास अधिकारी अरुण कुमार चौबे यांनी नोटा चोरल्याबद्दल अर्धवेळ सफाई कर्मचारी विशाल कुमार याच्यावरही गुन्हा दाखल करून त्याला नोकरीवरून काढून टाकले.
ऑडिट दरम्यान, तपास पथकाने नोटांच्या बंडलांची तपासणी केली असता, एक खरी नोट वर आणि एक खाली ठेवल्याचे उघड झाले. प्राथमिक तपासात केवळ ११.५ कोटी रुपयांच्या बनावट नोटा आढळून आल्या. ऑडिट पथकाचे अधिकारी अरुण कुमार चौबे यांनी सोमवारी रात्री ९ वाजता पोलिस ठाण्यात तक्रार दाखल केली. त्यानंतर तपासात १७ कोटी रुपयांच्या बनावट नोटा आढळून आल्या.
सदर बाजार पोलीस स्टेशनचे प्रभारी नेमचंद म्हणाले, की आधीच दाखल केलेल्या गुन्ह्यात आता बनावट नोटांचे मूल्य वाढवले जात आहे. ऑडिट पूर्ण होईपर्यंत ही रक्कम वाढू शकते: करन्सी चेस्टमध्ये पीएनबीच्या विविध शाखांकडून रोख रक्कम जमा होते. करन्सी चेस्टचे ऑडिट सध्या सुरू आहे. सध्या, बँक स्तरावर संशयास्पद व्यवहार आणि संबंधित नोंदींची चौकशी केली जात आहे.
तपास पूर्ण झाल्यावरच किती बनावट नोटा आहेत आणि ही समस्या किती व्यापक आहे हे स्पष्ट होईल. वरिष्ठ व्यवस्थापक निशा सिंग यांनी सांगितले, की बँकेचे अधिकारी तपास करत आहेत. करन्सी चेस्टमध्ये आणखी बनावट नोटा सापडण्याची शक्यता आहे.
