पाकिस्तानमध्ये जमियत उलेमाच्या रॅलीत बॉम्बस्फोट; ३५ ठार…
कराची: पाकिस्तानमधील खैबर पख्तुनख्वा प्रांतातील बाजौर जिल्ह्यातील खार तहसीलमध्ये आज (रविवार) जमियत उलेमा इस्लाम-फझल (JUI-F) च्या अधिवेशनात झालेल्या बॉम्बस्फोटात ३५ ठार तर 50 हून अधिक जण जखमी झाले. जखमींची प्रकृती गंभीर असल्यामुळे मृतांचा आकडा वाढण्याची शक्यता आहे.
पोलिसांनी दिलेल्या माहितीनुसार, जमियत उलेमा इस्लाम-फझल (JUI-F) च्या अधिवेशनात आज दुपारी 4.30 वाजण्याच्या सुमारास स्फोट झाला. यावेळी रॅलीत अनेकांची उपस्थिती होती. समर्थकांमध्येच हल्लेखोर उपस्थित होता. खारमधील जेयूआय-एफचे प्रमुख नेते मौलाना झियाउल्लाह जान यांचाही स्फोटात मृत्यू झाला. जखमींना पेशावर आणि टाइमरगेरा येथील रुग्णालयात हलवले जात आहे. जखमींमध्ये स्थानिक पत्रकाराचा समावेश आहे.
JUI-F चे नेते हाफिज हमदुल्ला म्हणाले, ‘स्फोटात आमचे सुमारे 35 कार्यकर्ते ठार झाले आहेत. मी या घटनेचा निषेध करतो. अशा हल्ल्यांनी आमचे मनोबल खचणार नाही. हल्ल्याची सखोल चौकशी झाली पाहिजे. आम्हाला कोणत्याही प्रकारची सुरक्षाही दिली जात नाही. हा मुद्दा आम्ही संसदेत मांडू.’ सरकारनेही या घटनेच्या चौकशीचे आदेश दिले आहेत. पाकिस्तान पीपल्स पार्टीचे अध्यक्ष बिलावल भुट्टो झरदारी यांनी हा हल्ला म्हणजे देशाला कमकुवत करण्याचे आणखी एक षड्यंत्र असल्याचे म्हटले आहे.
