टायगर श्रॉफच्या मारेकऱ्यांसाठी उत्तर प्रदेशातील दोन महिलांनी मुंबईत बंदुका आणल्या; कशा ते वाचा…
मुंबईः अभिनेता टायगर श्रॉफवर झालेल्या गोळीबार प्रकरणी दिल्ली पोलिसांच्या विशेष पथकाने चार जणांना अटक केली आहे. सूत्रांनुसार, हे चौघे लॉरेन्स बिश्नोई टोळीशी संबंधित असलेल्या एका गटाचा भाग होते, त्यांनी रविवारी संध्याकाळी अभिनेत्याच्या गाडीवर गोळीबार करणाऱ्या आरोपींना शस्त्रे पुरवली होती.
अटक करण्यात आलेल्या व्यक्तींची नावे कुणाल, सुमित, राधा आणि बबिता अशी असून, त्यांचे वय १९ ते २३ वर्षांच्या दरम्यान आहे. कुणाल आणि सुमित हे हरियाणातील सोनीपतचे रहिवासी आहेत, तर राधा आणि बबिता या उत्तर प्रदेशातील आहेत.
तपास अधिकाऱ्यांच्या मते, दुसऱ्या एका प्रकरणात नुकताच जामिनावर सुटलेला कुणाल, अभिनेत्यावरील हल्ल्याची जबाबदारी स्वीकारलेल्या अनिल पंडितच्या संपर्कात होता. अमेरिकेतून या टोळीचे कामकाज चालवल्याचा आरोप असलेल्या पंडितने, एका ऑडिओ संदेशातून या हल्ल्याची जबाबदारी स्वीकारली आहे.
सूत्रांनुसार, राधा आणि बबिता यांनी कुणालच्या सांगण्यावरून हल्ल्यात वापरलेली शस्त्रे मुंबईत आणली आणि आरोपींच्या हवाली केली. त्यानंतर दिल्ली पोलिसांच्या विशेष पथकाने त्या चौघांना मुंबई पोलिसांच्या ताब्यात दिले आहे. या अटकांमुळे, गोळीबाराच्या घटनेत वापरलेले शस्त्र पुरवणाऱ्या संपूर्ण टोळीचा पर्दाफाश झाल्याचे तपास अधिकाऱ्यांना वाटते.
तपास अधिकाऱ्यांच्या मते, तुरुंगातून सुटल्यानंतर कुणाल हरियाणातील हरसाना गावातील एका मित्राच्या माध्यमातून अनिल पंडितच्या संपर्कात आला. त्यानंतर त्याने एका एनक्रिप्टेड मेसेजिंग ॲपद्वारे पंडितशी संवाद साधायला सुरुवात केली. पंडितच्या सांगण्यावरून कुणालने अमृतसरहून एक पिस्तूल आणि २० काडतुसे मिळवल्याचा आरोप आहे.
सुमारे दोन महिन्यांपूर्वी, कुणाल राधाला भेटला, तिला आपल्या हालचालींची माहिती दिली आणि शस्त्र मुंबईला पोचवण्यासाठी तिची मनधरणी केली. १५ ऑक्टोबर रोजी, गोळीबाराच्या तीन दिवस आधी, कुणालने राधा आणि बबिता यांना नवी दिल्ली रेल्वे स्टेशनवर सोडले. तिथून त्या मुंबईला जाणाऱ्या ट्रेनमध्ये चढल्या. पिस्तूले राधाच्या बॅगेत लपवलेली होती. प्रवासादरम्यान, कुणाल एका एनक्रिप्टेड मेसेजिंग ॲपद्वारे त्या दोन महिलांच्या संपर्कात राहिला आणि पंडितकडून आलेल्या सूचना त्यांना पोचवत होता.
हल्ल्याच्या एक दिवस आधी, १७ ऑक्टोबर रोजी त्या दोन महिला दादर स्टेशनवर पोचल्या आणि एका हॉटेलमध्ये उतरल्या. सकाळी सुमारे ११ वाजता, राधाकडून बॅग घेण्यासाठी एक अल्पवयीन मुलगा हॉटेलजवळ आला. १८ ऑक्टोबर रोजी, हृतिक, रेहान आणि फूल सिंग या तीन आरोपींनी सायंकाळी ७ वाजण्याच्या सुमारास हा हल्ला केल्याचा आरोप आहे.
घटनेनंतर, पंडितने कुणालला सांगितले की शूटर मुंबईत अडकले आहेत आणि त्यांना शहरातून बाहेर काढण्याची व्यवस्था करण्याचे निर्देश दिले. त्याच दिवशी, राधा आणि बबिता दिल्लीला परतण्यासाठी दादरहून हरिद्वार एक्सप्रेसमध्ये चढल्या. त्यांना २० ऑक्टोबर रोजी नवी दिल्ली रेल्वे स्टेशनवर पकडण्यात आले. कुणाल आणि सुमित यांना हरियाणातील सोनीपत येथे अटक करण्यात आली.
हृतिक, रेहान आणि फूल सिंग दुसऱ्या दिवशी राजस्थानच्या कोटा येथे पळून जाण्याचा प्रयत्न करत असताना त्यांना ट्रेनमध्ये अटक करण्यात आली.
