डोळा मारणं आणि फ्लाईंग किस देणेही लैंगिक छळच…
नवी दिल्ली : एखाद्याला पाहून डोळा मारणे किंवा फ्लाईंग किस करणे हे देखील लैंगिक छळ केल्याच्या श्रेणीत येते. पॉक्सो कोर्टने असे करणाऱ्या एका 20 वर्षीय युवकाला एका वर्षाची शिक्षा सुनावली आहे. शिवाय, त्याला 15000 रुपयांचा दंडही ठोठावण्यात आला आहे.
न्यायालयाने आपल्या निर्णयात सांगितले की, आरोपी युवकाने अल्पवयीन मुलीला पाहून डोळा मारणे आणि फ्लाईंग किस करण्याचे कृत्य केले होते. जे लैंगिक छळ मानले जाऊ शकते. शिवाय, न्यायालयाने आरोपीला 15 हजार रुपयांचा दंड ठोठावला असून, त्यापैकी 10 हजार रुपये पीडित पक्षाला दिले जाणार आहेत.
प्रसारमाध्यमांनी दिलेल्या वृत्तानुसार, 14 वर्षीय पीडित मुलगी 29 फेब्रुवारी रोजी ती आपल्या बहिणीसोबत जात होती. यावेळी शेजारी राहणाऱ्या आरोपीने तिला पाहून डोळा मारला आणि तिला फ्लाईंग किस केला. आरोपीने याआधीही अशाप्रकारचं कृत्य अनेकदा केले होते. त्याला समजवल्यानंतरही तो तसेच वागत होता. त्या मुलीने या प्रकाराबाबत तिच्या आईला सांगितले होते. अनेकदा त्याला अशा वागणूकीबद्दल समजवण्यात आले, परंतु त्याच्या वागण्यात कोणताही बदल न झाल्याने त्याच्याविरोधात पोलिसात तक्रार दाखल करण्यात आली.
या प्रकरणी सुनावणीवेळी बचाव पक्षाच्या वकिलांनी, त्या मुलीने आणि तिच्या आईने केलेले आरोप लैंगिक छळ म्हणून पाहू नये, तसेच वकिलांनी असाही आरोप केला की, पोलिसांनी या प्रकरणी योग्य तपास केला नाही. परंतु, न्यायालयाने बचाव पक्षाच्या युक्तीवादाकडे दुर्लक्ष केले. न्यायालयाने आपल्या निर्णयात सांगितले की, असे कोणतेही कारण दिसत नाही, ज्यामुळे पीडितेने लावलेले आरोप चुकीचे आहेत, हे स्पष्ट होऊ शकेल. परंतु असे अनेक पुरावे आहेत की आरोपीला बऱ्याचदा अशा प्रकारच्या कृत्यापासून परावृत्त करण्यात आले. न्यायालयाने, एखाद्याला डोळा मारणं किंवा फ्लाईंग किस करणे हे छळ करण्याच्या श्रेणीत येत असल्याचे सांगितले.
बचाव पक्षाने असाही आरोप केला की, पीडितेची चुलत बहिण आणि आरोपीमध्ये 500 रुपयांची बेट लागली होती. त्या बेट मुळेच आरोपीने डोळा मारला. परंतु पीडित मुलीने न्यायालयात हा आरोप फेटाळला आहे. तिने बेट लागल्याची बाब पूर्णपणे चुकीची असल्याचे सांगितले. आरोपी युवक सतत अशाप्रकारचे कृत्य करत होता. बचाव पक्षाने न्यायालयात अनेकदा पीडिता आणि तिच्या आईचे आरोप खोटे असल्याचे वारंवार सिद्ध करण्याचा प्रयत्न केला. परंतु, न्यायालयाने पीडित मुलीच्या बाजूने निकाल दिला.
