आरोपी दत्ता गाडे याला पकडण्याचे श्रेय घेण्यासाठी सगळेच पुढे; पण खरं पकडलं कोणी पाहा…
शिरूर (अरुणकुमार मोटे) : पुणे शहरातील स्वारगेट बसस्थानकात शिवशाही बसमध्ये युवतीवर (वय २६) झालेल्या बलात्कार प्रकरणातील फरार आरोपी सराईत गुन्हेगार दत्तात्रय गाडे (रा. गुनाट ता. शिरूर ) याला पकडण्यात गुन्हे शोध पथकाच्या कर्मचाऱ्यांमुळे स्वारगेट पोलिसांना अखेर यश मिळाले.
स्वारगेट पोलिसांबरोबरच पुणे ग्रामीण गुन्हे शोध पथकाचे पोलिस आरोपी दत्तात्रय गाडे याचा कसून शोध घेत होते. आरोपी दत्तात्रय गाडे याने पुणे -अहिल्यानगर रोडवर २० ऑक्टोबर २०१९ रोजी दुपारी न्हावरा फाटा ते चौफुला रोडवर एका महिलेला चौफुला येथे सोडतो असे सांगून कर्डे घाटाच्या पुढे गेल्यावर महिलेच्या पर्स मधील ३८ हजार रुपये किंमतीचे दागिने चोरून नेले होते. याबाबत शिरुर पोलिस ठाण्यात तक्रार दाखल झाल्यानंतर शिरूर पोलिस स्टेशनचे तत्कालीन पोलिस हवालदार संजू जाधव, संजय साळवे यांनी तपास करून दत्तात्रय गाडे याला गजाआड केले होते. या आरोपी कडून अनेक चोरीचे गुन्हे उघडकीस येऊन त्याच्याकडून सुमारे ४ लाख ८७ हजार ६५० रुपये किमतीचे सोन्याचे दागिने व ६ लाख रुपये किमतीच्या स्विप्ट गाडीसह असा १० लाख ८७ हजार ६५० रुपयांचा मुद्दे माल जप्त केला होता. त्यामुळे आरोपीची बऱ्यापैकी ओळख संजू जाधव यांना होती. तो त्यांना चांगल्या प्रकारे ओळखत होता. याचा फायदा घेत गुन्हे शोध पथकाचे संजू जाधव यांनी गुणाट गाठत सहकाऱ्यांसमवेत त्याचा शोध घेण्याचा प्रयत्न केला.
ड्रोनच्या साह्याने शोधत त्याला माईक वरून आवाज देत मी पोलिस संजू जाधव आहे, तू स्वाधीन हो, पळून जावू नको.. असे विश्वासात घेऊन त्याला आवाहन करण्यात आले. आरोपीने पोलिस संजू जाधव यांचा आवाज ओळखताच तात्काळ पोलिस संजू जाधव यांच्या मोबाईलवर फोन केला. व मी उसाच्या बाहेर येवून हजर होतो असा प्रतिसाद दिला व थोड्याच वेळात बाहेर येत जाधव साहेब मी बाहेर आलोय असे ड्रोन कडे पाहून ओरडत होता. तो बाहेर आल्यानंतर स्वारगेट पोलिसांनी त्यांना पकडून पुढील कार्यवाहीसाठी त्याला पुणे येथे नेण्यात आले.
पकडण्याचे श्रेय घेण्यासाठी सगळेच पुढे…
आरोपी दत्तात्रय गाडे ऊसातून बाहेर आल्यानंतर तातडीने स्वारगेट पोलिसांनी ताब्यात घेत स्वताःची पाठ थापटून घेण्याचा प्रयत्न केला आहे. तसेच गुन्हा घडल्यानंतर शिरूर पोलिस स्टेशन यांना तातडीने न कळवल्याने आरोपी पकडण्यास वेळ गेला होता. नाहीतर आरोपी तात्काळ गजाआड झाला असता. आरोपी दत्तात्रय गाडे पोलिस हवालदार संजू जाधव यांच्या आव्हानाला प्रतिसाद देत उसातून बाहेर आला. त्याला पकडण्यास सिंहाचा वाटा असणारे पोलिस हवालदार संजू जाधव व पाटील पोलिस सोनवणे यांच्यावर शिरुर तालुक्यातील नागरीकांकडून कौतुकाचा वर्षाव होत आहे.
आरोपी दत्तात्रय गाडेमुळे राजकीय वातावरण ढवळले…
दत्तात्रय गाडे याचा माजी आमदार अशोक बापू यांच्या बॅनर वर फोटो आढळून आला आहे. त्यामुळे आमदार अशोक पवार यांच्यावर टीका होत होती. तसेच दत्तात्रय गाडे याच्या व्हॉटसअप डीपीवर आमदार माऊली कटके यांचा फोटो होता. त्यामुळे त्यांच्यावरही राजकीय टीका टिपण्णी मोठ्या प्रमाणावर होत आहे. तो कोणाचाही कार्यकर्ता असला तरी त्याला हे असले प्रकार करण्यास कोणी राजकीय पाठिंबा देत नव्हते हे नक्की.
पुणे पोलिस आयुक्तांनी आरोपी दत्ता गाडे बाबत दिली महत्तावाची माहिती; आत्महत्येचा प्रयत्न…
स्वारगेट बलात्कार प्रकरणातील आरोपी दत्ता गाडे गजाआड; तहान लागली अन्…
स्वारगेट बलात्कार प्रकरणातील आरोपी दत्तात्रय गाडे याचे मिळाले लोकेशन…
पुणे पोलिसांनी दत्तात्रय गाडे याच्या मैत्रिणीला बोलावलं अन् माहिती आली समोर…
स्वारगेटच्या बसस्थानकात कंडोम, चादरी अन् दारुच्या बाटल्या…
पुणे शहरातील स्वारगेट डेपोत युवतीवर बलात्कार; अंधारात ताई-ताई बोलला…
